Nestor Malgapo's Artworks

NESTOR MALGAPO’S ARTWORK

Isa sa hinahangaan ko ay ang dibuhistang si Ka Nestor Malgapo. Naging taga-subaybay na niya ako maski noong hindi pa ako nagsusulat sa komiks. Gandang-ganda ako sa kanyang dibuho at napaka-refine niyang gumuhit na katulad ni Nestor Redondo. Walang padaplis-daplis na gaya ng iba na parang inilampaso ang brush ng tinta sa kanilang mga gawa kaya nagmumukhang dugyot ang pagkakaguhit. Ang una kong natipong gawa niya noon ay ang idinibuho niyang nobela na may titulong “Baryo Abandonado na aking ipina bookbind. Ganoon din ang labis kong hinangaan na illustration niya sa nobelang “Ang Huling Lalaki ng Baluarte,” na lumabas sa Pilipino Komiks. Pulido ito at napakaganda ng kanyang pagpapatakbo sa istorya. Gandang-ganda rin ako sa nobelang ito ni Carlo J. Caparas. Subalit ang hindi ko alam ay kung bakit naputol ang kanilang tambalan ni Carlo sa latest part ng nobela na itinuloy naman ng mahusay ding si Karl Komendador. Bilib din ako kay Karl basta action ang iginuguhit lalo na at may pagka-western ang tipo. Kinumpleto ko pa rin ang nobelang ito na akin ding ipina bookbind gaya ng nauna.

Nang nagsusulat na ako sa GASI, may illustrator na nanghiram sa akin ng librong ito na guhit ni Nestor Malgapo at ipapo-photo copy daw para magamit niyang reference. Hindi ko naman siya pinagmaramutan , pero nang kinukuha ko na sa kanya ay parang ayaw ng isoli. Tila pinag-interesan kung baga. Sa pangungulit ng katoto kong writer na si Benedict Del Gallo sa kanya, isinoli rin niya pero may mga bahagi ng punit, although hindi naman nabawasan ang pahina. Ang ginawa ko ay nilagyan ko na lang ng scotch tape para huwag namang tuluyang masira. Ito kung minsan ang mahirap sa nagmamagandang loob na magpahiram, hindi nila iniingatan ang isang bagay tulad ng pag-iingat dito ng may-ari.

Balik tayo sa trabaho ni Ka Nestor Malgapo. May isa pa siyang ginawang illustrations na higit na pulido at napakaganda ng pagkakadibuho. Ito ay lumabas sa LIWANAG Illustrated Magazine. Ang komiks na ito ay inilabas noong 1999 ng IGLESIA NI CRISTO. Nabigyan ako ng kopya nito ng aming katiwala ng Purok sa Lokal ng Maharlika sa San Jose Del Monte City sa Bulacan at ng buklatin ko ay napa-wow ako. Si Nestor Malgapo pala ang illustrator nito.

Ang Liwanag Illustrated Magazine ay naglalaman ng talambuhay ni Ka Felix Y. Manalo na sinulat naman sa comics script ni Ka Nita Eden. Ang alam ko ay maglalabas pa sana ang Iglesia ni Cristo ng kasunod na issue sa pagsubaybay ni Ka Nestor ayon naman sa pagkakakuwento sa akin ng yumaong Ka Nar De Mesa noon. Katunayan ay hinihingan niya ako ng mga komiks script na para sa Liwanag Illustrated Magazine. Mga kuwentong inspirational ito at may kinalaman sa pananampalataya. Ilan sa mga kapwa ko komiks scriptwriter at illustrator noon na sina Eddie Conda Abuque, Jun Estrada at Joven Gapuz ay nahingan din subalit hindi yata nag-prosper ang project. Ganoon pa man, Ka Nestor Malgapo’s artwork in this Ka Felix Manalo’s autobiography were now in included in my bookshelves.