Wednesday, July 29, 2015

Prinsesa Urduha, Prinsesa Bituin and Prinsesang Mandirigma



Pagkatapos nating makilala ang tatlong limot ng mga prinsipe, tatlong prinsesang komiks characters na posibleng limot na rin ang atin namang alalahanin ngayon.  

 
Unahin natin si PRINSESA URDUHA.  Isa siya sa pinakamatandang komiks character na nakita ko dahil nang ipakilala siya sa mga pahina ng Pilipino Komiks, kasisilang lang ng komiks na ito noong June 14, 1947. Si Prinsesa Urduha ay isinalarawan ng komiks illustrator/painter and National Artist na si Vicente Manansala at nakasama ito  sa unang batch ng mga komiks character na nagbigay aliw at kasiyahan sa mga mambabasang tumangkilik noon sa naturang komiks. 


Isunod natin si PRINSESA BITUIN. Ipinakilala ang komiks character na ito ng dalawang komiks writers na sina Mario Mijares Lopez at Anastacio Angeles sa pahina ng Bituin Komiks noong 1950’s.  Ang beteranong dibuhista na si Cris Caguintuan ang gumawa ng larawan sa pabalat (cover illustration) ni Prinsesa Bituin na inilathala ng F.G. Quioge publication. 

Pangatlo sa listahan natin ng mga prinsesang komiks character si PRINSESANG  MANDIRIGMA.  Nilikha siya ng komiks writer na si Clodualdo Del Mundo, ka-tandem ang dibuhistang si Fred Carrillo noong 1962. Si Prinsesang Mandirigma ay nabasa at sinubaybayan ng mga komiks readers sa mga pahina ng Espesyal Komiks na inilalathala ng Ace Publication. Ito’y isinalin din sa pelikula ng People’s Pictures Inc. sa ilalim ng pamamahala ni Director Teodorico C. Santos. Ang beteranang actress naman na si Cecilia Lopez ang gumanap sa title role.

Marami pang mga prinsipe at prinsesang nilikha ang ating mga Filipino komiks creators noon at naipakilala sa ating local komiks, but for the meantime, sina Prinsesa Urduha, Prinsesa Bituin at Prinsesang Mandirigma muna ang ating pagbalikang tanaw sa Komixpage.


Monday, July 27, 2015

Prinsipe Amante, Prinsipe Ahmad and Prinsipe Amado



Kilalanin naman natin ang mga “prinsipe” na nilikha ng ating mga Pinoy komiks creators.  Tiyak na nalimot na ang mga pangalang ito, dahil mahigit anim na dekada na halos ang  nakalipas mula nang sila’y malathala sa komiks. Ganoon man, nakalulugod pagbalikang alaala ang mga komiks character  na minsan ay umaliw at naging bahagi ng buhay ng ating mga lolo at lola, nanay at tatay.

 
Unahin natin si PRINSIPE AMANTE. Ang komiks writer/novelist na si  Mario Del Mar ang nagpakilala sa kanya sa mga pahina ng Aksiyon Komiks na inilathala ng Arcade Publication noong dekada 50’s. Naka-tandem ni Mario Del Mar and dibuhistang si Alfredo P. Alcala para bigyang buhay nito sa kanyang mga larawang guhit  si Prinsipe Amante.

 
Pangalawa si PRINSIPE AHMAD. Isa siyang katha’t guhit ni Alfredo P. Alcala na ipinakilala nito sa mga pahina ng Silangan Komiks noong March 15, 1950. Ito’y inilathala ng isa sa kauna-unahang independent komiks publication noon, ang Silangan Publishing.



Ihanay natin sa dalawang nauna si PRINSIPE AMADO, ang komiks character na ipinakilala ni Severino Reyes na mas kilala sa kanyang pseudonym na Lola Basiang. Nai-feature siya sa seryeng “Mga Kuwento ni Lola Basiang” na lumabas sa Tagalog Klasiks noong October 7,1950. Ang kuwento ni Prinsipe Amado ay isinalin sa komiks ng creator ng Kulafu na si Pedrito Reyes. Si Francisco V. Coching  ang nagdibuho ng cover illustration nito.
  
Pinagbabalikang tanaw ng Komixpage ang tatlong prinsipeng komiks character na sina Prinispe Amante, Prinsipe Ahmad at Prinsipe Amado



Friday, July 24, 2015

Atlanta, Buntala and Galazxha



Hindi lang si Darna ang babaeng Super heroine na nakilala at sinubaybayan ng mga readers ng komiks noon. Marami pang sumunod sa kanyang yapak at ang ilan sa kanila ang atin ngayong kikilalanin.



Unahin natin si ATLANTA. Sa mga pahina ng Superyor Komiks (NR Publication) ko nakita ang  kanyang cover illustration na iginuhit ni Nestor Redondo. Ang super heroine na ito ay nilikha ng komiks writer/publisher na si Rading Mina Sabater ka-tandem si Noly Zamora na siyang gumawa ng mga larawang guhit sa inside pages.


Si BUNTALA naman ay sa mga pahina ng Planet Komiks (PSG Publishing) ipinakilala ng creator nito na si Rene Rosales noong 1970’s. Pseudonym ng komiks writer/novelist na si Pablo S. Gomez ang Rene Rosales. Bagamat si Alfredo Alcala ang gumuhit ng cover illustration ni Buntala, ang ka-tandem dito ni Rene Rosales at gumagawa ng mga larawang guhit sa inside pages ay si Hal Santiago.



Pangatlo si GALAZXHA na isa na namang likha ng mayamang kaisipan ng creator nitong si Jess Grafilo. Si Galazxha ay ipinakilala ni Mr. Grafilo sa mga pahina ng Pinoy Komiks noong dekada 90, ka-tandem ang dibuhistang si Jim Espallardo.

Pinagbabalikang tanaw ng Komixpage ang mga super heroine komiks characters na sina Atlanta, Buntala at Galazxha.


Wednesday, July 22, 2015

Raul Roldan, Brix Virgo and Rex Samson



Kung may Flash Gordon sa US Comics na nakilala sa kanyang mga kamangha-manghang pakikipagsapalaran, meron din naman tayong tatlong bidang komiks character na hindi pahuhuli sa kanya ang mga naging adventure. Sa pangalan pa lang, ng tatlong ito, may dating na sa ating pandinig, ganoon man, tiyak kong nalimot na rin sila dahil ilang dekada na halos ang lumipas mula nang sila ay ipakilala ng kanilang mga creators. Sila ngayon ang muli nating alalahanin.


Unahin natin si RAUL ROLDAN. Ang komiks character na ito ay unang ipinakilala ng creator nito na si Mars Ravelo sa mga pahina ng Hiwaga Komiks noong dekada 50. Ka-tandem niya sa pagbibigay buhay ng nobelang ito si Nestor Redondo na nagbahagi ng kanyang mga larawang guhit.


Pangalawa si BRIX VIRGO. Ang karakter na ito na nakilala rin sa kanyang mga pambihirang pakikipagsapalaran ay nilikha ni Clodualdo Del Mundo. Ito’y kanyang ipinakilala sa mga pahina ng Pilipino Komiks noong 1966, ka-tandem ang dibuhistang si Jess Jodloman


Pangatlo si REX SAMSON. Ito’y isang katha’t guhit ni Nestor Redondo na kanyang ipinakilala sa mga pahina ng Modern Komiks, na inilalathala mismo ng sarili niyang publication. Unang natunghayan ng mga komiks readers ang mga pakikipagsapalaran ni Rex Samson noong mid 60’s. (Kasama ito sa mga nabili ko kay Mang Vir Redondo noong late 80’s sa GASI, kaya nagkaroon ako ng tsansang mabasa ng buo ang nobelang ito at matunghayan ang pulidong dibuho ni Nestor Redondo) 

Pinagbabalikang tanaw ng Komixpage ang mga komiks characters na sina Raul Roldan, Brix Virgo at Rex Samson.